ദോഹ:ഖത്തർ ഇന്റർനാഷണൽ ഫുഡ് ഫെസ്റ്റിവൽ (QIFF) 2026ന്റെ 15-ാം പതിപ്പ് വൻവിജയത്തോടെ സമാപിച്ചു. 974 സ്റ്റേഡിയം പ്രിസിൻക്റ്റിൽ പത്ത് ദിവസങ്ങളിലായി നടന്ന ഫെസ്റ്റിവലിൽ 4,90,493 സന്ദർശകർ പങ്കെടുത്തു. ഫെസ്റ്റിവൽ ചരിത്രത്തിലെ ഏറ്റവും വലിയ പങ്കാളിത്തമാണിത്.
വിജിറ്റ് ഖത്തർ സംഘടിപ്പിച്ച ഈ മൈൽസ്റ്റോൺ പതിപ്പ്, ഭക്ഷണം, സംസ്കാരം, വിനോദം എന്നിവയുടെ സമന്വയത്തിലൂടെ QIFF-നെ ഖത്തറിലെ പ്രധാന സാംസ്‌കാരിക–പാചകോത്സവങ്ങളിലൊന്നായി വീണ്ടും ഉറപ്പിച്ചു. കഴിഞ്ഞ വർഷത്തെ അപേക്ഷിച്ച് 36 ശതമാനം അധികം സന്ദർശകരാണ് ഇത്തവണ ഫെസ്റ്റിവലിലെത്തിയത്.
സന്ദർശകരിൽ 10 ശതമാനം അന്താരാഷ്ട്ര അതിഥികൾ ആയിരുന്നു. ഖത്തർ പൗരന്മാർ 22.1 ശതമാനം പങ്കാളിത്തത്തോടെ മുൻപന്തിയിൽ നിന്നപ്പോൾ, 32 ശതമാനം പേർ വീണ്ടും വീണ്ടും എത്തിയ സന്ദർശകരായിരുന്നുവെന്നത് ഫെസ്റ്റിവലിന്റെ ജനപ്രീതി വ്യക്തമാക്കുന്നു.
QIFF 2026-ൽ 200 പ്രാദേശിക ഭക്ഷ്യവിതരണ കേന്ദ്രങ്ങൾ ഖത്തറിന്റെ ആഭ്യന്തര പാചക വൈവിധ്യം അവതരിപ്പിച്ചു. കൂടാതെ, കഴിഞ്ഞ പതിപ്പിനെക്കാൾ 43 ശതമാനം വർധനയോടെ 46 അന്താരാഷ്ട്ര ഭക്ഷ്യവിതരണ കേന്ദ്രങ്ങൾ ആഗോള രുചികൾ ഫെസ്റ്റിവൽ വേദിയിലെത്തിച്ചു. 50-ലധികം പ്രാദേശികവും അന്താരാഷ്ട്രവുമായ ഷെഫുകൾ ലൈവ് കുക്കിംഗ് ഡെമോ, വർക്ക്‌ഷോപ്പുകൾ, പ്രത്യേക ഡൈനിംഗ് അനുഭവങ്ങൾ എന്നിവയ്ക്ക് നേതൃത്വം നൽകി.
ആദ്യമായി അവതരിപ്പിച്ച QIFF അവാർഡുകൾ ഫെസ്റ്റിവലിന് പുതുമ നൽകി. ഹൂക്കീസ് കുക്കീസ് (Longest Line), ഐബിസ് ദോഹ (Favourite Local Vendor), 99 ഗ്രിൽ (Favourite International Vendor), ടാക്കോ കിംഗ് (Favourite Chef) എന്നീ പുരസ്‌കാരങ്ങൾ നേടി. ഖത്തറിന്റെ പാചക രംഗത്തിന് നൽകിയ സംഭാവനകൾക്ക് ശകർജിയ്ക്ക് പ്രത്യേക ആദര പുരസ്‌കാരവും സമ്മാനിച്ചു.
റെക്കോർഡ് പങ്കാളിത്തവും വിപുലമായ അന്താരാഷ്ട്ര സാന്നിധ്യവും വൈവിധ്യമാർന്ന പരിപാടികളും കൊണ്ട് QIFF 2026, ഖത്തറിന്റെ വാർഷിക പരിപാടി കലണ്ടറിലെ പ്രധാന സ്തംഭമായി വീണ്ടും ഉറപ്പിച്ചു. അടുത്ത വർഷത്തെ ഫെസ്റ്റിവലിനായുള്ള പ്രതീക്ഷകളോടെയാണ് ഈ ചരിത്രപതിപ്പ് സമാപിച്ചത്.